RSS     Despek
ماڵه‌وه‌| هه‌واڵ| وتار| دیمانه‌| ئه‌ده‌ب‌وهونه‌ر| نووسه‌ران| له‌ مێدیاکانه‌وه‌‌| رۆژهه‌ڵات‌تایمز و خوێنه‌ران| په‌یوه‌ندی
22 October 2014
بگه‌رێوه‌| ناردن بۆ دۆستان‌| چاپ| 3255 جار بینراوه‌| 9 بۆچوون|

"شیرین" له دو به‌‌رهه‌می وه‌فایی و هێمن دا

4 Aug 2012
avatar
سه‌لاح گوڵ ئه‌ندامی

پێشه‌کی ‌
ئه‌و وتاره که‌ لێره‌دا بڵاو ده‌بێته‌‌وه به نێوی شیرین له دو به‌رهه‌می وه‌فایی و ‌هێمن دا ، له‌ ئه‌سڵدا وتارێکه به نێوێ شیرین ته‌شی نارێسێ به‌ڵام بۆ ئه‌وه‌ی به‌شێکی جیاوازی شیرین له روانگه‌ی دو شاعیری کورد مامۆستا وه‌فایی و مامۆستا هێمن باس ده‌کا ، لێره‌دا به‌و نێوه بڵاوی ده‌که‌مه‌وه ، بۆیه باسی مه لێره‌دا لێکدانه‌وه‌ی شێعری شیرین ته‌شی ده‌رێسێی مامۆستا وه‌فایی نیه و باس باسی جیاوازی دو شیرین و سرجنێک له سه‌ر شێعره‌که‌ی مامۆستا هێمن به نیسبه‌ت شێعری شیرین ته‌شی ده‌رێسێی مامۆستا وه‌فاییه .

سه‌رده‌‌مایه‌ک بو ، هه‌ستی دینی له ناو خه‌ڵکدا پته‌و بو ، نه کوردایه‌تی پێش دینی ده‌گرت و نه دینداریش به شێوه‌ی روانینی کوردایه‌تی ئێستا پێشی کوردایه‌تی ده‌گرت. له‌و سه‌رده‌مه‌دا شاعیریکی کورد و خودا ناس ، ئه‌هلی دڵ ، ته‌شی به‌ ده‌ستێک له نێوان ره‌نگه سه‌دان ته‌شی رێس ده‌بینێ و شاکاره شێعرێک ده‌خوڵقێنێ به نێوی " شیرین ته‌شی ده‌رێسێ". له سابڵاغی ئه‌و کات ئافره‌تانی دیکه‌ش به شێوه‌ی شیرین یان ته‌شیان ده‌رست یان ، خه‌ریکی کاری وه‌ک یارمه‌تی باخه‌وانی ، تفاق و جۆ دان به مه‌ر و ماڵآت و ته‌ندور داخستن و نان کردن و شتی دیکه‌ی له‌و بابه‌ته بون. کچی وامان نه‌بو تروسکه‌ی لوله‌ی تفه‌نگی هه‌ستی وه‌فایی بجوڵێنێ، سابلاغ وه‌ک زۆربه‌ی شاره‌کانی دیکه‌ی کوردستان شارێکی سونه‌تی بو، وه‌فایی که روانگه‌یه‌کی عارفانه و دیندارانه‌ی به دونیا هه‌بوو ره‌نگدانه‌وه‌ی هه‌ستی عرفانی خۆی له هه‌مو شت دا ده‌دیت ، بۆیه کاتێک شیرینی ته‌شی رێس ده‌بینێ ته‌نیا ته‌شی نیه که سرنجی راده‌کێشێ، چونکه چی زۆر بو ته‌شی و ته‌شی رێس ، شیرین شتێک له وجودی دابو که ئاسمانی بو له جنسی زکر و خه‌ڵوه‌تی خانه‌قا، زه‌رافه‌تێکی شێخانه که ده‌کرا له قودره‌تی جه‌زه‌به‌ی شێخانی نه‌هریدا لێی بگه‌رێی.

وه‌فایی رۆحیاتی تایبه‌ت به خۆی هه‌بوه. سۆفی مینه‌ی حه‌لاج ده‌ڵێ: که‌ره‌تێکیان من و میرزا عه‌بدوڵا له گه‌ڵیدا ( مه‌به‌ست لە گەڵ مامۆستا وه‌فاییه ) چوینه باغی و هه‌ر ئه‌وه‌نده‌مان خۆش بوو گه‌یشتینه پۆلێک گوڵی گوڵاوی تازه پوشکوتوو، دیتمان وه‌کوو که‌سێکی گڕ گرتوو ئاور تێبه‌ربوو که خۆی بگه‌یه‌نێته ئاو یا عاشقێکی سوتاو خۆی بخاته مه‌عشوقێکی دوروڵات و دڵرفێنی خۆی خسته نێو پنجه گوڵه‌که و باوه‌شی پێدا کرد و ده‌ستی به هاوار و گریان و وت و وێژی عاشقانه و راز و گله‌یی و هه‌ڵبه‌ست و شێعر خوێندنه‌وه كرد تا بێهۆش بوو .... ١. وه‌فایی به‌و رۆحیاته‌وه ده‌روانێته شیرین و بۆنی عه‌ترێک ده‌کا که درێژه‌ده‌ری هه‌مان بۆن و به‌رامه‌ی کوچه باغه‌کانی سابلاغێ بوو، جۆره ساده‌یه‌کی عه‌زه‌مه‌ت که له گوڵه باغێکدا به دی ده‌کرا، ئه‌و ته‌شیه زۆری فه‌رق بو ،، ئه‌و ته‌شیه له ده‌ستانی مه‌له‌کوتی کچه کوردێکدا، له مانای ساده‌ی رستن ده‌چوه ده‌ر ، له عه‌رزی خاکی تێپه‌ر ده‌بوو به دڵدا هه‌ڵده‌‌کشا و سه‌ری له ئاسمان و کاکه‌شانه‌کان وه‌ده‌ر ده‌نا،
تایێکی ڕیشه‌یی دڵ، به‌ نووکی غه‌مزه‌ دادا
ده‌ستێکی بۆ سه‌ما برد ڕووبه‌ندی ماهی لادا
نافه‌ی گوڵی عه‌یان بوو، عه‌تری به‌ ده‌م سه‌با دا
باریک و لووس و ناسک، دوو زولفی خاوی بادا
وه‌ک شاخی گوڵ به‌ لا دا، شیرین ته‌شی ده‌ڕێسێ
..
ئیدی ئه‌وه‌ی ده‌یبینێ نه‌ک سوڕانی ته‌شی به‌ڵکوو خولانه‌وه و نور پژاندنی ئه‌ستیران له فه‌زای بێکه‌راندایه

که‌ که‌وته‌ چه‌رخ و گه‌ردیش ته‌شی به‌ ده‌ستی ڕه‌نگین
هه‌ودای له‌ لێو و ده‌م دا، خورشیدی سینه‌ نه‌سرین
سه‌مای به‌ "زوزه‌نه‌ب" دا "که‌فولخه‌زیب"ی شیرین
گرتی خه‌تی "مه‌دارات"، شه‌فه‌ق به‌ "عه‌قدی په‌روین""
سێحرێکه‌ بۆ دڵ و دین، شیرین ته‌شی ده‌ڕێسێ
......
نووکی ته‌شی به‌ گه‌ردیش قوتبێکه‌ چه‌رخی پێوه
"مه‌جه‌ڕڕه" بوو به‌ داوی که‌ چه‌رخی که‌وته‌ نێوه‌
وه‌ک "زوهره" ده‌ستی کێشا که‌ به‌ندی قه‌وسی زێوه‌
ئه‌ستێره‌ ماهی داگرت سابت کرا به‌ پێوه‌
ئاره‌ق به‌ ڕوو به‌ڕێوه‌، شیرین ته‌شی ده‌ڕێسێ ٢


وه‌فایی که شێعر له ده‌رویندا قوڵپه‌ی کرد، له گه‌ڵ سورانی ته‌شی به شێوه‌ی ده‌روێشه‌کان سورا و زکری کرد و حاڵی لێ هات و سه‌ری له جێگه‌یه‌ک وه‌ ده‌ر نا که پیامێک بوو بۆ ئه‌وانه‌ی ئه‌هڵی دڵ و جوانین. سه‌د و چه‌ند ساڵ گوزرا ته‌شیه‌کی شیرین له چه‌شنی ئه‌ستێران به‌ر ده‌وام ده‌سوراوه تا که‌سێک هات به نێوی مامۆستا هێمن و ویستی رای گرێ ، بۆیه هات له پێشدا شیرینێکی دیکه‌ی ناساند، شیرینێکی بێ ته‌شی:
من ته‌شیڕێسێــکی وه‌ک شــــــــــــیرنی وه‌فاییم بۆ چییه‌؟
کیژی وریای چاوکراوه‌ی فــــــــــــێره‌زانـــــــــــــــــینم ده‌وێ

که‌م نه‌بون و نین ئه‌وانه‌ی وا دازنن به هاتنی ئه‌و شیرینه شیرینی وه‌فایی باوی نه‌ماوه و ده‌بێ ته‌شیه‌که‌ی فرێ دا. هه‌ر له سه‌ره‌تاوه مامۆستا هێمن شیرنی وه‌فایی به گێل و چاو به‌ستوو ده‌زانێ و ته‌نیا هۆیه‌که‌یشی له ته‌شی رستن دا ده‌بینێ!!!

ئه‌و زه‌مان کارخانه‌جاتمان نه‌بوه و ته‌شی رستن به‌شداری ئافره‌ت له سورانی چه‌خی ئابوری و بژێو بۆ درێژه‌ی ژیان بوه. کار کردن هیچ کات، ئێستاشی له گەڵ بێ، نیشان دانی نازیره‌کی و گێل بوون نه‌بوه و نیه. له ئوروپا به هه‌زاران کچ و ژن خه‌ریکی کار له رستوران و هوتێلداری و ده‌ست شویی خاوێن کردنه‌وه‌ن که‌سیش به نه‌زان ناویان نابا. ته‌شی رستنی شیرین له کۆمه‌ڵگایه‌کی سونه‌تی ئه‌و کات یانی کار له حەوزەی بەرھەمھێنان و هه‌بوونی رۆڵی ژن له چه‌رخه‌ی ئیقتساد دا. که‌وابوو ته‌شی رستنی شیرین بۆ ده‌بێته ملاکی چاو به‌ستویی و نه‌زانی؟

له لایه‌کی دیکه‌وه‌ش با له باری جوان ناسێوه چاوی لێ بکه‌ین. ئه‌گه‌ر ئه‌و قسه له زاری ئینسانێکی بێ قه‌ریحه‌ی شێعر و بێ زه‌وق و هه‌ژار له باری هێزی خه‌یاڵەوه هاتبا ده‌ر قه‌‌یدی نه‌بوو. به‌ڵام جێگای سه‌رسورمان و داخه که‌سێکی وه‌ک مامۆستا هێمن که خۆی شاعیرێکی ناسک خه‌یاڵه ئاوا بروانێته شێعر. به بروای من ئه‌و تێگه‌یشتنه هه‌ڵه‌یه زۆرتر ده‌گه‌رێته‌وه سه‌ر ئه‌وه که مامۆستا هێمن ئه‌وه‌ی له به‌ر چاو نه‌گرتوه که عیشق شێعری شیرین ته‌شی ده‌رێسێی خولقاندوه. بۆ ئه‌وه‌ی عیشق حزوری هه‌بێ ده‌بێ فه‌قه‌ت عاشق و مه‌عشوق له گۆرێ دابن و به‌س. مامۆستا وه‌فایی جوان په‌ره‌ست به‌و مانایه که جوانی له جنسی ئافره‌تدا خولاسه‌ی کاته‌وه نه‌بوه. ئه‌گه‌ر وا با عاشق نه‌ده‌بوو. جوان په‌ره‌ست له ژێر ته‌وژم و فشاری روحێدا نیه، ناسوتێ و نازانێ هیجران چییه، چونکه جێگری بۆ مه‌عشوق هه‌یه، ئه‌و جوانه نا جوانێکی دی، وه‌ چونکه جوانی مه‌حدود نیه وه‌فاداری به مه‌عشوق و مانه‌وه‌ش غه‌یرە مومکینه و هیچ کات ناگاته ئاخ و سۆز و توانه‌وه و پله‌یه‌ک به نێوی عیشق. ئه‌گه‌ر خودی شێعره‌کانی مامۆستا هێمن بکه‌یه‌نه محه‌ک، مامۆستا هێمن رۆح و هه‌ستی به دیتنی هه‌ر ئافره‌تیکی جوان وه شه‌پۆل که‌وتن ده‌که‌وێ:

جوان په‌ره‌ستم جوان په‌ره‌ستم
به دیداری جوانان مه‌ستم
هه‌تاکوو جوانێ ده‌بینم
سارێژ ده‌بێ گشت برینم
یان ده‌ڵێ:
جیلوه‌یی جوانی له‌ هه‌رچی دا هه‌بێ خۆشم ده‌وێ
ڕۆژێ کوشته‌ی مینی ژۆپ و ڕۆژێ گیرۆده‌ی شه‌ده‌م،

ھێمن له فرمێسکی رنوو دا ده‌ڵێ
‌من به‌ فرمێسکی ڕنووی کوێستانی کورد په‌روه‌رده‌ بووم
کوڵمی سوور و چاوی شین و سینگی به‌فرینــم ده‌وێ

که وا بوو مامۆستا هێمن به شێوه‌ی شاعیرانی وه‌ک نالی مه‌ستوره‌ی خۆی نیه، یان وه‌ک وه‌لی دێوانه بۆ کچێک به نێوی شه‌م ناسوتێ، که‌چی وه‌فایی شیرینی خۆی هه‌یه. که‌ وا بوو زۆر گرینگه بزانین که مامۆستا وه‌فایی باسی ته‌به‌قه‌ی ئافره‌ت به عام ناکا و شیرین نوێنه‌ری جنسی ئافره‌تی کورد نیه. شیرین یه‌ک که‌سه و هه‌ر چۆن هه‌ر ئینسانێک مافی خۆیه‌تی مه‌عشوقی خۆی خۆش بوێ و پێیدا هه‌ڵبڵێ ماۆستا وه‌فاییش ئه‌و کاره‌ی کردوه. که‌چی شیرینی مامۆستا هێمن له باسی عاشقانه ده‌رواته ده‌ر و نوێنه‌ری ئافره‌تی کوردی سه‌ده‌ی نوێیه که مامۆستا هێمن بانگه‌شه‌ی بۆ ده‌کا و به ئاواتی ده‌خوازێ. بۆیه به داخه‌وه مامۆستا هێمن به روانگه‌یه‌کی جوان ناسی چاو له شیرینی مامۆستا وه‌فایی ناکا و له دونیای مه‌عنه‌ویات و شێعر ده‌چێته ده‌رێ. ئەو جۆرێک به‌رخورد له گه‌ڵ ئه‌و شێعره‌ ده‌کا که گۆیا مامۆستا وه‌فایی ئێعلامیه‌‌ی ده‌رکردبێ و کچی کورد به ته‌شی رستن هان بدا و دژی خوێندن و زیره‌کی بێ.

ده‌بێ بزانین كە کچه کوردێک ئه‌و کاته ته‌شی ده‌رست، پیاوی کوردیش کڵاشی ده‌كرد، جاجم و به‌رماڵی ده‌چنی و ئه‌گه‌ر بێتو شاعیرێک زه‌رافه‌ت و جوانییه‌ک له ده‌سته‌کانی پیاوێکی کڵاش چندا ببینێ و بیکا به شێعر نابێ پێمان وا بێ شاعیره‌که پیاوی کورد هان ده‌دا وه‌ شوێن خوێندن نه‌که‌‌ون. لێره‌دا به داخه‌وه عاله‌می مه‌عنه‌وی و دونیای شێعری مامۆستا وه‌فایی ده‌رک ناکرێ و له جیات روانگه‌یه‌کی شاعیرانه بۆ شێعره‌که به شێعرێکی ره‌خنه‌یی کۆمه‌ڵایه‌تی که له فکری سیاسی ئاو ده‌خواته‌وه وه‌ڵآمی شێعرێکی عاشقانه و عارفانه ده‌داته‌وه که دو دونیای ته‌واو لێک جودان. لێره‌دا نامهه‌وێ بچمه نێو باسی رۆڵی ژن له شێعری مامۆستا هێمن دا. ته‌نیا ده‌مهه‌وێ هه‌ڵسه‌نگاندێک بکه‌م بزانین جیاوازی ئه‌و شیرینانه له چی دان. جا با بزانین مامۆستا هێمن چ جۆره شیرێنێکی ده‌وێ:
ئه‌و شیرینه‌ی مامۆستا هێمن که زۆر شاعیر به شێعر پێشوازی لێ ده‌که‌ن و زۆر نوسه‌ر له پێشه‌کی کتێبی نوسه‌رانی ئافره‌تدا بۆ نمونه ده‌یهێنه‌وه له‌و به‌یته‌دا زۆر به رونی باسی لێ کراوه:
من ته‌شیڕێسێــکی وه‌ک شــــــــــــیرنی وه‌فاییم بۆ چییه‌؟
کیژی وریای چاوکراوه‌ی فــــــــــــێره ‌زانـــــــــــــــــینم ده‌وێ
به‌ڵام به راستی مامۆستا هێمن ئه‌گه‌ر شیرینی وه‌فایی ره‌ت ده‌کاته‌وه ئایا خۆی باوه‌ری به‌ شیرینی خۆی هه‌یه؟! ئایا به راستی هه‌ر زیره‌کی و وریایی لێ ده‌وێ؟! من ده‌ڵێم نا و مامۆستا هێمن له چه‌ندین جێگا له چوارچێوه‌ی تاریفی خۆی له شیرین لاده‌دا بۆ نمونه له شێعری به‌هاری کوردستاندا ده‌ڵێ :
لێو ئاڵن، ده‌م بچووکن خوێن شیرن، ڕه‌زا سووکن
کوڵمه‌یان وه‌ک گڵوکن گه‌وره‌ کچن، نه‌و بووکن
…..
شل و مل و له‌بارن چاو به‌کل، گوێ به‌ گوارن
ده‌سماڵ پووڵه‌که‌دارن شه‌ده‌ و گێلگێله‌دارن
…..
ناسک و نه‌رم و نۆڵن خاوێنن ، سپی و سۆڵن
بڵباسی و توند و تۆڵن به‌ مژۆڵ جه‌رگان ده‌کۆڵن
…..
هه‌ڵیان ماڵیوه‌ باسک باسکی قه‌ڵه‌و و ناسک
که‌ ده‌که‌ن تاسکه‌ تاسک ڕه‌وه‌کترن له‌ ئاسک
…..
کیژی مه‌زرینگ و سه‌کرن به‌ له‌نجه‌ و لار ڕاده‌برن
ناز ده‌که‌ن چاو داده‌گرن کوڕگه‌ل ده‌به‌ریان ده‌مرن
…..
کابانی قۆڵ به‌ بازن شه‌نگه‌بێری کێل گه‌ردن
له‌ نێو مه‌ڕ دێن و ده‌چن وه‌ک پۆلی پۆڕان ده‌چن

له کۆتایدا ده‌ڵێ:
مامز دایگرتووه‌ شیری ناسک ده‌کوشێ په‌نیری
ناز ده‌شێلێ هه‌ویری کاڵێ ده‌کا نان تیری
هه‌ر وه‌ک ده‌بینین لێره‌دا خه‌به‌رێک له زیر‌ه‌کی نیه، کیژ لێره ‌دا کێل گه‌ردن و خاوه‌ن له‌نجه و لارن و نازان ده‌که‌ن، چاو داده‌گرن و دڵی کوڕان یه‌خسیر ده‌که‌ن. مامۆستا هێمن ته‌شی له ده‌ستی شیرین فرێ ده‌دا به‌ڵام شیری پێ ده‌دۆشێ و په‌نیری ده‌کوشێ و به یه‌کی دیکه هه‌ویر ده‌شێڵێ!!! پرسیار ئه‌وه‌یه ئه‌گه‌ر ئێمه له باسی جوان ناسی و دونیای شێعر بچینه ده‌ره‌وه یانی هه‌ر ئه‌و کاره‌ی خودی مامۆستا هێمن ده‌رحه‌ق به وه‌فایی کردویه‌تی، ناکرێ بڵێین سه‌د ره‌حمه‌ت به شیرینی ته‌شی رێس؟!

من ئه‌گه‌ر بمهه‌وێ چ له باری شێعرێوه یان هه‌ر وه‌ک ده‌قێکی ساده قه‌زاوه‌ت له سه‌ر ئه‌و دو شیرینه بکه‌م به سه‌راحه‌ت ده‌ڵێم شیرینی وه‌فایی به ده‌یان به‌ڵگه سه‌ر و گه‌ردنێک له شیرینی مامۆستا هێمن له سه‌رتره. ئێمه له دونیای شێعری وه‌فاییدا له گه‌ڵ شیرینێکی سادق، ساکار، کورد، به حوجب و حه‌یا و نه‌گۆڕ ته‌ره‌فین، که‌چی له هی مامۆستا هێمن دا وا نیه له شێعری بۆ کچه کوردێکدا ده‌ڵێ :
کچه کوردێکی نه‌شمیل و له باری
به‌وه‌ی نییه ماوه‌یه‌که چویه شاری
ئه‌گه‌ر پێت خۆشه هه‌روا بت په‌رستم
نه‌که‌ی لاده‌ی له دابی کورده‌واری
که‌چی له شوێنێکی دیکه‌دا :
جیلوه‌یی جوانی له‌ هه‌رچی دا هه‌بێ خۆشم ده‌وێ
ڕۆژێ کوشته‌ی مینی ژۆپ و ڕۆژێ گیرۆده‌ی شه‌ده‌م

مینی ژۆپ له گه‌ڵ دابی کورده‌واری به تایبه‌تی دێهات ناته‌بایه و به پێچه‌وانه‌ی ئه‌و شته‌یه‌ که شاعیر لە شێعرێكی زووتری دا خه‌می بۆ ده‌خوا. بۆ مامۆستا هێمن لێره ‌دا گرینگ داب و نه‌ریت و ره‌سه‌ن مانه‌وه نیه، گرینگ جوانیه که داب و نه‌ریتیشی فیدا ده‌کا و شه‌ده و مینی ژوپ یه‌ک شتن.
سه‌رچاوه‌کان
١ . دیوانی وه‌فایی ، میرزا عە‌بدول ره‌حیمی سابلاغی چاپی سه‌یدیان له مه‌هاباد

٢. ساغ کردنه‌وه دیوانی وه‌فایی ، کاک سوله‌یمانی چیڕه
ناردن بۆ تۆڕه‌ کۆمه‌ڵایه‌تی‌یه‌کان
Facebook| My Yahoo| Twitter| google| Balatarin Balatarin
سه‌لاح گوڵ ئه‌ندامی|7 Aug 2012 - 01:36
کاک حه‌سه‌ن سوره‌ چۆمی

منیش ده‌ڵێم مامۆستا هێمن باسی کچی پاک و سه‌نگینیشی کردوه له وتاره‌که‌شمدا باس کراوه به‌ڵآم قسه له‌وه‌یه ، هه‌ر جاره‌ی جۆره کچێکی ده‌وێ ، و له هه‌موشیاندا ، کچه مه‌رجه ده‌بێ له بار و ناسک و نوڵ بێ ، جا چ بێری بێ ، یان پێشمه‌رگه یان مینی ژۆپی له به‌ر دابێ یانیش خه‌رکی نوێژ بێ
سه‌لاح گوڵ ئه‌ندامی|7 Aug 2012 - 01:29
کاک تاهیری به‌رێز ، تۆش بنوسه زۆر خۆشحاڵ ده‌بم با وا فکر نه‌که‌ن هه‌موو دژ به شیرینی وه‌فاییه و شیرینی مامۆشتا هێمن بۆیان ملاکه ، ره‌نگه تۆ شتی جالبترت پێ بێ بۆ کوتن ، من وه‌ک ئه‌رکێک چاوم لێ کرد بۆیه نوسیم تۆش ئه‌رکی خۆت به جێ بێنه ،
حه سه ن سووره چومى|6 Aug 2012 - 11:41
مامۆستا هێمن کە دەڵێ من تە شی ڕێسێکی وەک شیرنی وەفاییم بۆ چییە مەبە ستی خودی خۆی نەبوە کە بە تەمەنی پیریەوە کچێکی جحێڵی جوانی مەبەست بێ بۆ نیازی ڕابواردن ..بەڵکوو مەبەستی ئەوە بوە کە بۆ کۆمەڵگای کوردی و نەجات بوون لەژێر دەستی پێویستە کە کچی زاناو ڕۆشنبیر لە بوارە جیاجیاکاندا بۆ کۆمەڵگای کوردی پێویست ترە تا کچێک کە هەموو هونەرەکەی تەشی ڕێسی بێ... کارم بە ڕابووردو ی مامۆستا هێمن نییە کە کمۆنیست بووە یا تودە یا هەر شتێکیتر گرینگ ئەوەیە کە کاتێک ئەم هۆنراوەیەی نوسیوە هەستێکی تەواو کوردانە و شۆڕەشگێڕانەی بووە هەروەکوو
‌ئەم هەستە جوان و کوردانەیەی لە شێعرەکەدا بەدەی دەکرێ کە دەڵێ ...
‌من تەشی ڕێسێکی وەک شیرنی وەفاییم بۆ چییە..
‌کیژی ئازای چاوکراوەی فێرە زانینم دەوێ..
‌بۆ نەجاتی نیشتمانی بەش خوراوی کاولم..
‌لاوی ئازادەی بەکارو کیژی سەنگینم دەوێ......

‌کە هەر کەسێک شێعرەکە بخوێنێتەوە و ئاسنای ئەدەب و نووسینی کوردی بێت دەزانی کە ( کچی سەنگین ) بۆ شۆڕ ش و پارزگاری شان بە شانی لاوەکان مەبەست لە کچێکی ڕوو سوورە کە تەواو کچێکی خاوەنی تایبەت مەندیەکانی کوردەواری و کۆمەڵگای کوردەوارییە و مامۆستا هێمن کچێکی سەنگین و بە خوو ڕەوشت و زانای کوردەواری بە باشتر زانیوە تا تەشی ڕێسێک...
تاهیر|6 Aug 2012 - 09:42
وەڵا کاک سەلاح ئەمنیش هەر بە تەما بووم شتێک لەو بارەوە بنووسم. بابەتەکەشم ناو نابوو "رقی شیرن". چونکە مامۆستا هێمن لە تەمەنی خۆی دا لانیکەم سێ جار بە گژ شیرنی وەفایی دا چۆتەوە و دەکرێ بڵێم تا رادەیەک بێ بەزەییانە لە گەڵی جوڵاوەتەوە. یەکەمیان ئەو کاتەی ئەندامی ژێکاف و تۆبەکردووی رێبازی کوردایەتی بووە لە یادگاری شیرن دا، دووهەمیان ئەو کاتەی کە دوای چەند ساڵ ئاوارەیی دەگەڕێتەوە رۆژهەڵاتی کوردستان و لە فرمێسکی رنوو دا و دوا جاریش ئەو کاتەی سەرەپەرەستی ئینتشاراتی سەلاحەدینی ئەیوبی کردووە و بە کردەوە و بە پێچەوانەی ناوەرۆکی ئەو دوو بەیتە شێعرەی پێشووی، ئەمجار هەر بە شێعری وەفاییشی نازانێ و ناهێڵێ لە دیوانەکەی وەفایی دا چاپ بکرێتەوە. بە هەر حاڵ ئەو هەودایە دوور و درێژە و رەنگە ئەمنیش نەپەرژێم لە سەری بنووسم.
سامڕند|6 Aug 2012 - 08:47
وێڕای سڵاو و دەستخۆشی لە نووسەری بابەت،

كاك سەلاح بە وردی لە بەرھەمی مامۆستا ھێمن ی ڕوانیوە و سەرنجی داوەتە دوفاقی یەك كە لە شێعر و لە ڕوانینی ئەو شاعیرە دا بەدی دەكرێ. بەڕاستی جار وا ھەیە كە كچە كورد تەشویق بە ڕاگرتنی دابی كوردەواری كراوە، و جاری واش ھەیە كە بە و ڕادەیە شاعیر بە پەرۆشی ئەو ڕاگرتنەوە نیە. نەزەری كاك سەلاح ڕاستە كە تەشی ڕستن نیشانەیەك نیە بۆ دواكەوتوویی و چاونەكراوەیی و شتی وا.
حه سه ن سووره چومى|5 Aug 2012 - 15:01
.من پێم وایە ئەم شێعرەی مامۆستا هێمن کە دە ڵێ من تەشی ڕێسێکی وەک شیرنی وەفاییم بۆ چییە زیاتر پەیامێکە بۆ کچانی ئەم سەردەمەی کوردستان کە گەلۆ کچینە بە تەشی ڕستن بە هیچ جێگایەک ناگەن وسەردەم سەردەمی زانست و پێشکەوتنە ولە تەشی ڕستن ڕا وەرنە ڕێزی کچانی خوێندەوارو خاوەن زانست کونجی ماڵ و تەشی ڕستن هەر بە کۆیلەیی دەتانهێڵێتەوە.. ڕاستە شێعرەکە باسی مامۆستاوەفای شیرنی تەشی ڕێسیشێعرەکەی دەکا بەڵام ناتوانین ئەم حوکمە بدەین کە مامۆستا هێمن ویستبێتی کە ڕەخنە لە مامۆستا وەفایی بگرێ .وە ئەگەر وەهاش بێت ئەوە ماموستا هێمن کارێکی زۆر بە جێ کردوە ئەرک و مافی خۆیەتی کە شێعرێک کە هەم پیامی پێشکەوتنە بۆ کچانی تەشی ڕێس و هەم بۆ شاعیرێکیش کە لە شێعرێکدابۆ کچێکی کوردی چەوساوە ی ژێر سیستمی پیاوسالاری تەنها بە جەوهەری تەشی ڕێسیەکەی داڕۆچۆتە خوار لایەنی چۆن دەربازبوون لەقۆناغی تەشئ ڕێسی و کابانی وکۆیلەیی ئەم کچە و ژنانی تەشی ڕێسی لە بیر نەبووە یا هەر نەیویستوە باسی بکا..
سه‌لاح گوڵ ئه‌ندامی|5 Aug 2012 - 01:07
به‌رێز کاک شه‌ماڵ

ئه‌من ئه‌و شته‌م نه‌دیتوه و هه‌ر وه‌ک کوتم ئه‌و به‌شه‌ێک له وتاره‌که‌ی منه ، به‌ڵام به دوایدا ده‌گه‌رێم ، ئه‌گه‌ر وا بێ له ئه‌سلی مه‌سئه‌له ‌که‌م ناکا و زۆریش خوشحاڵ ده‌بم که‌سێکی دیش وه‌ک من بیری کردۆته‌وه ، ئه‌ورۆ نه‌هاتومه ناو دونیای ئه‌ده‌بیات که شتیێ بزانم نوسراوه منیش دوباره‌ی که‌مه‌وه ، شتێکی وا بو ئه‌و جێگایه‌ی وه‌ک هی ناو براو بچێ ناوی ده‌بم . زۆر زۆر سپاس بۆ یارمه‌تیت
ahoora|4 Aug 2012 - 13:56
dast xxosh ,babataka ba ray mnawa jvani bo choy o la bohdeki hastmandana o mahnavi shiit krdotawa.ba sopas o rez
شەماڵ|4 Aug 2012 - 12:53
کاک سەلاح برالە ئەم ووتارە ھەربەم ناوە یاتۆزی جیاوازتر بەلام ھەر بەیەک ناوەرۆکەوە لە گۆفاری سروەدا لە سالەکانی 64 و65 کاندا لە لایەن کاک حەکیم مەلا سالحەوە بڵاوکرایەوە ، بی زەحمەت با خوینەران و خۆیشت بچن سەیرێکی سروە بکەن بزانن وایە یا نا .
ھەر بژیت

تۆش ده‌توانی به‌شداریی له‌و باسه‌دا بکه‌ی به‌ مه‌رجێک:
- به‌شداریت پێوه‌ندیی به‌ ناوه‌رۆکی بابه‌ته‌وه‌ هه‌بێ نه‌ک ره‌خنه‌ له‌ که‌سایه‌تیی نووسه‌ران یان که‌سایه‌تیه‌کان
- زمانێکی وه‌هات به‌ کار نه‌هێنابێ که‌ رۆژهه‌ڵات‌تایمز به‌ بێ‌ڕێزی به‌ که‌س یان لایه‌نێکی تایبه‌تیی بزانێ





avatar
avatar
avatar

avatar
avatar
avatar
avatar
avatar
avatar
avatar
avatar
avatar
avatar


هه‌موو مافێکی ئه‌م ماڵپه‌ڕه پارێزراوه|بڵاوکردنه‌وه‌ی بابه‌ته‌کانی رۆژهه‌ڵات‌تایمز به‌ بێ ئاماژه به سه‌رچاوه‌ی بابه‌ت قه‌ده‌غه‌یه